Вилоят клиник касалхонасида жигар алмаштириш жарроҳлиги жорий йил иккинчи марта ўтказилди. Бу ҳақда матбуот анжуманида касалхона бош шифокори Жанбўлат Дилдабеков маъруза қилди.

Тадбирда 9 нафар донор ва аъзолик қабул қилган бемор билан суҳбат ўтказилди. Уларнинг ҳар бири ўз тақдири ва ҳиссиётлари билан ўртоқлашди. Ҳаётга қайтган беморлар донорларга миннатдорчилик билдиришди. 

Туркистон вилояти, Саврон туманида истиқомат қилувчи Элвира Сахидинова ўз онасига донор бўлганини айтиб берди. 

– Онам 6 йил давомида жигар етишмовчилигидан азият чекди. Оилада 5 фарзандмиз. 2024 йил қондошлик донори ҳақида эшитгач, шифокорларга мурожаат қилдик. Менинг таҳлилларим тўғри келди, текширувлардан ўтгач, онамга донорлик қилдим. Ҳозир 20 ёшдаман. Соғлигим яхши. Мени дунёга келтирган онам учун жонимни ҳам беришга тайёрман, – дейди Элвира.

Шунингдек, матбуот анжуманида журналистлар ва шифокорларнинг эркин мулоқоти ҳам ўтказилди. Клиникада ўтказилаётган трансплантология жарроҳликлари республика бош жарроҳи, “А. Н. Сизғанов номидаги Миллий-илмий хирургия маркази” профессори, академик Бўлатбек Баймаханов раҳбарлигида амалга оширилаётганини маълум қилди.

29 сентябрь куни вилоят клиник касалхонасида иккинчи жигар трансплантацияси муваффақиятли ўтди. 54 ёшли беморга 24 ёшли ўғли донор бўлди. Амалиётдан сўнг бемор назоратда, ҳозирда соғлиги яхши.

Журналистлар тадбир якунида гемодиализ бўлими фаолияти билан яқиндан танишишди.

Айтиш жоизки, ҳозирги кунда республика бўйича 4 мингдан зиёд одам аъзо алмаштириш навбатида турибди. Бу эса донорлик маданиятини янада ривожлантириш, аҳоли орасида соғлом ҳаёт ва ҳамдардлик ғояларини кенг тарғиб этиш зарурлигини кўрсатади.