Тадбир «Южный Казахстан: 100 йил – газетхон билан бирга» мавзуидаги ижодий кеча шаклида нишонланди. Унда вилоят ҳокими Нуралхан Кўшеров, вилоят маслаҳати раиси Нурали Абишов, Қозоғистон Парламент Мажлиси депутати Сергей Пономарев, оммавий ахборот воситалари вакиллари ва журналистика соҳасининг фахрийлари иштирок этдилар.

Тадбирда вилоят ҳокими Н. Кўшеров газетaнинг 100 йиллик юбилейи билан табриклаб, таҳририят жамоасига хизмат автомашинаси калитини топширди. 

– Барчангизни вилоятда ўз ўрнига эга «Южный Казахстан» газетасининг 100 йиллиги билан чин дилдан қутлайман! Газета – жамиятнинг овози, халқ ва ҳокимият орасидаги олтин кўприкдир. У доимо давр руҳини акс эттириб келган. Саҳифаларида – минтақанинг тарихи, одамлар тақдири ва иқтисодий-маданий соҳада эришилган ютуқлар аксини топган, – деди ҳоким.

Тадбир давомида расмий шахслар, ҳамкорлар ва ОАВ вакиллари сўзга чиқиб, ҳозирги журналистиканинг долзарб масалалари, минтақавий ОАВнинг аҳамияти ва рақамли даврда босма газетанинг роли ҳақида фикр билдирдилар. Шунингдек, журналистика фахрийларига эҳтиром кўрсатилди ва «Таҳририят ҳаётининг бир куни» номли ҳужжатли фильм намойиш этилди.

Кечада «Ветер перемен» номли янги китобнинг ҳам тақдимоти ўтди. Унда таҳририятнинг бир асрлик шонли йўли, журналистларнинг тақдири баён этилган.