Туркистон шаҳри ҳокими Азимбек Пазилбекули қишки мавсумга тайёргарлик жараёни билан танишди. Шу муносабат билан у қатор ижтимоий иншоотларни оралаб, “Марказий қозонхона”, 1-ва 2-сонли қозонхоналарнинг фаолиятини назорат қилди ва шаҳар болалар шифохонаси, 

А. Байтурсинов номидаги умумий ўрта мактабнинг иссиқлик тизими ҳолатини кўздан кечирди.

Туркистон шаҳри бўйича бугунги кунда 18та қозонхона фаолият юритмоқда. Улардан 12таси йил бўйи иссиқ сув билан таъминлайдиган марказлаштирилган тизимга уланган. 

1-ва 2-кичик туман ҳудудларидаги 75та кўп қаватли уй марказлаштирилган иссиқлик тизимига уланган ва қишки мавсумга шай ҳолатга келтирилган. Бюджет ташкилотлари орасида жами 97та ижтимоий иншоотнинг тайёргарлиги ҳам тасдиқланган.

Туркистон шаҳри табиий газ билан тўлиқ таъминланган. Бугунги кунда 45614 фойдаланувчи тизимга уланган бўлиб, улар орасида 77та мактаб, 141та болалар боғчаси бор. Йил бошидан буён 31 мингдан зиёд фойдаланувчида текширувлар ўтказилиб, 8458 ҳолатда камчиликлар аниқланган. Уларни бартараф этиш учун огоҳлантириш берилган. Бундан ташқари, 120та уйга газосигнализатор ўрнатилиб, хавфсизлик даражаси оширилди. 

Ҳоким барча қозонхоналар ва ижтимоий иншоотларнинг қишга тўлиқ тайёр бўлиши, захира қувват манбаларини назоратда ушлаш ва аҳолига иссиқлик энергиясини узлуксиз етказишни топширди. 

– Қишки мавсумга тайёргарлик фақат коммунал хўжаликнинг вазифаси эмас, балки шаҳар ҳаётининг барқарорлиги ва аҳоли хавфсизлиги учун масъулиятдир. Ҳар бир уй иссиқ, ҳар бир ташкилот хавфсиз бўлиши шарт, – деди Азимбек Пазилбекули.

Шаҳар ҳокимлиги томонидан барча иншоотларнинг тайёргарлиги доимий назоратга олинган. Тегишли бўлимлар ҳафталик ҳисобот тақдим этиб, аниқланган камчиликлар ўз вақтида бартараф этилмоқда. Туркистон шаҳри қиш мавсумига қишни барқарор ва хавфсиз ўтказишга тайёр.