Туркистон шаҳридаги “Дўстлик уйи”да Қозоғистон халқи Ассамблеясининг 30 йиллиги доирасида “2025 йил – Ишчи касблари йили” муносабати билан ўтказилган “Чанғароқ” вилоят танловининг ғолиб ва совриндорлари тақдирланди.

Журналистлар ва ижтимоий тармоқ фойдаланувчилари орасида ўтказилган танловнинг асосий ғояси – минтақада этнослараро дўстликни мустаҳкамлашга ҳисса қўшиш, ижтимоий тотувлик ва бирликни мустаҳкамлаш, меҳнат одамларининг ҳаётини тарғиб қилишдан иборат эди.

Вилоят Ижтимоий тараққиёт бошқармаси “Жамоат тотувлиги” ДКК ташкилотчилигида уюштирилган танловда минтақадаги ОАВ вакиллари ва ижтимоий тармоқ фойдаланувчилари иштирок этиб, миллатлараро тотувлик, дўстликни тараннум этувчи, меҳнат одамларини улуғловчи ижодларини тақдим этишди.

Танловнинг тақдирлаш маросимида “Жамоат тотувлиги” ДКК раҳбари Элмира Жанғазиева барчани Республика куни билан қутлаб, фаол ижодкорларга миннатдорчилик билдирди. 

Бирликни тараннум этувчи танлов якунларига кўра, ҳакамлар ҳайъати қарорига биноан, касбий медиатор Жулдиз Ўтегенова 1-ўринга сазовор бўлиб, 150 минг тенге пул мукофотига эга бўлди. 2-ўринни ХҚТУнинг Журналистика факультети катта ўқитувчиси Атиркул Ташимова (100 минг тенге), 3-ўринни эса Қозоғистоннинг Фахрий журналисти Роза Наримбетова (50 минг тенге) эгаллади.

Танловда иштирок этган бошқа ОАВ вакиллари ва ижтимоий тармоқ фойдаланувчилари ҳам Туркистон вилоят Ижтимоий тараққиёт бошқармаси томонидан Фахрий ёрлиқлар ва пул мукофотлари билан тақдирланишди.