Қасим-Жўмарт Тўқаев фуқароларни ҳимоя қилиш соҳаси ходимларини касб байрами муносабати билан табриклади. Давлат раҳбари мамлакат хавфсизлиги ва халқ фаровонлиги йўлида хизмат қилаётган қутқарувчиларни “Тинчлик даври қаҳрамонлари” деб атади.

Президентнинг сўзларига кўра, кейинги йилларда табиий офатлар вақтида кўрсатилган мардонавор ва жасоратли ҳаракатлар – қутқарувчиларнинг юксак масъулияти ва фидойилигидан далолатдир. Сўнгги беш йил ичида улар 225 мингга яқин инсон ҳаётини сақлаб қолишган.

Давлат раҳбари сўнгги йилларда соҳага катта эътибор қаратилганини таъкидлади: фавқулодда вазиятлар вазирлиги қайта ташкил этилди, соҳани молиялаштириш икки ярим бараварга оширилди, 1700дан зиёд  янги техника харид қилинди  ва 40дан зиёд ёнғинга қарши хизмат деполари барпо этилди. Шу билан бирга, қутқарувчиларнинг маоши 77 фоизга оширилиб, қўшимча имтиёзлар жорий этилди.

Қ. Тўқаевнинг таъкидлашича, фуқаролар хавфсизлигини таъминлашда рақамлаштириш ва замонавий технологияларни жорий этиш муҳим аҳамият касб этади. Шунингдек, жамоатчилик, оммавий ахборот воситалари ва таълим муассасалари ҳам бу йўналишда фаол ҳамкорлик қилиши лозим.

Тадбир якунида Президент хизмат бурчини бажаришда жасорат ва матонат кўрсатган бир гуруҳ қутқарувчиларни давлат мукофотлари билан тақдирлади.