Туркистон шаҳридаги “Дўстлик уйи”да Қозоғистон халқи Ассамблеясининг 30 йиллиги муносабати билан вилоят ўзбек этномаданият бирлашмаси томонидан “Ўзбек тил, маданият ва анъаналари куни”га бағишланган байрам тадбири ташкил этилди.

Тадбир иштирокчилари дастлаб этномаданият бирлашмаларнинг кўргазмасини томоша қилдилар.

Тантанали маросимда зиёлилар, вилоят ҚХА ҳузуридаги “Эл бирлиги” депутатлар гуруҳи ва Ассамблея аъзолари, этномаданият бирлашмалари раҳбарлари ва фаоллари, Ассамблея ёшлари, шаҳар аҳли ва меҳмонлар иштирок этдилар.

Байрам тадбирида Қозоғистон халқи Ассамблеяси раиси ўринбосари, ҚХА котибияти мудири Марат Азилханов, вилоят ҳокимининг ўринбосари Ертай Алтаев ҳамда вилоят маслаҳати раиси Нурали Абишев сўзга чиқиб, жамиятдаги тотувлик ва миллатлараро ҳамжиҳатлик мамлакат тараққиётининг асосий омилларидан бири эканини таъкидладилар.

Ўзбекистоннинг Алмати шаҳридаги Бош консулхонаси биринчи котиби Эркинжон Абдуқаюмов Қозоғистоннинг бағрикенглик ва бағриочиқлик сиёсати бутун жаҳон ҳамжамияти учун ўрнак бўлаётганини қайд этди. Шунингдек, Қозоғистон ўзбеклари “Дўстлик” ҳамжамияти раиси Икром Ҳошимжонов ҳамда вилоят ўзбек этномаданият бирлашмаси раиси Баҳодир Ирисметов нутқ сўзлаб, халқлар ўртасидаги бирдамлик ва дўстликни кўзнинг қорасидай асраш зарурлигини таъкидладилар.

Тадбир давомида миллатлараро тотувликни мустаҳкамлаш ва мамлакат тараққиётига ҳисса қўшган бир гуруҳ фаол фуқаролар Президент фармонига асосан “ҚХАга 30 йил” ҳамда “Дўстлик уюшмасига 30 йил” юбилей медаллари, ҚХАнинг ташаккурнома ва фахрий ёрлиқлари, шунингдек вилоят маслаҳати ҳамда ҳоким ўринбосари номидан тақдирландилар.

Бирлик ва дўстликка чорловчи тадбир вилоят маданият соҳаси ходимлари, Ўзбекистоннинг таниқли эстрада юлдузлари ҳамда этномаданият бирлашмалари бадиий ҳаваскорларининг байрам концерти билан якунланди.