Нодирхон Имомсидиқов раҳбарлик қилаётган Юсуф Сарёмий номли 107-сонли мактаб-лицейида  2024-2025 ўқув йили битирувчилари учун “Оқ йўл, талаба!” тадбири уюштирилди. 

Тадбирда 2025-2026 ўқув йилининг давлат грантига сазовор бўлиб, республика  ва хорижий давлатларнинг олий ўқув юртларида бепул таҳсил олиш имкониятига эга бўлган ўғил-қизлар, шунингдек,  ҳомийлар, ЎЭМБ раислари, мактаб жамоаси, грант соҳибларининг ота-оналари иштирок этишди.

Жами бу йил мактаб-лицейни 124 нафар битирувчи тамомлади, уларнинг 96 нафари ЯМТ топшириб, 92 нафари давлат гранти учун танловда иштирок этди. Қувонарлиси, 90 нафар йигит-қиз олий ўқув юрти талабасига айланди. Шу жумладан, мактаб битирувчиларининг 74 нафари Астана, Алмати, Туркистон, Қарағанди ва Шимкент шаҳарларидаги олий ўқув юртларида таҳсил олса, 16 нафари АҚШ, Хитой, Испания, Туркия, Греция ва Ўзбекистон мамлакатларининг энг илғор ОЎЮнинг давлат грантлари асосида ўқиш имкониятини қўлга киритишди.

Тадбирда сўзга чиққанлар фарзандларга тарбия берган мактаб устоз-мураббийлари ҳамда ота-оналарига миннатдорчилик билдиришди. Шунингдек, ёшларга мустақил ҳаётда муваффақиятлар, яқинлар ишончини оқлаш ва юрт тараққиётига муносиб ҳисса қўшиш каби эзгу тилаклар билдирдилар.