Бугунги кунда турмушимизда энг кўп учраётган воқеалардан бири – фирибгарлик. Алдаш, ишончни суиистеъмол қилиш эвазига бировнинг пули ёки мулкини эгаллаб олиш тубан жиноятлардан ҳисобланади. Жиноятнинг бу тури кейинги йилларда кўпайгани сир эмас.

Содда одамларни алдаб, пулини олиб, бемалол яшашни ўзларига касб қилиб олаётган шахслар ҳақидаги хабарларни интернет тармоқларида ҳам кундаликда учратиш мумкин.

Бир воқеа тафсилоти билан танишинг. Уч боланинг онаси Зиёда Қосимова (исм-шарифи ўзгартирилди) уяли телефонига қараб ўтириб, буюмлар рекламасида тўхтади. Бир қимматбаҳо буюмни шу йўл орқали харид қилмоқчи бўлди. Дарҳол тегишли рақамга қўнғироқ қилиб, буюртма берди... 

Орадан бир неча кун ўтди. Ниҳоят, телефонига қўнғироқ бўлиб, буюртмаси тез кунларда манзилига етиб боришини айтишди. Зиёда кутди, ахир 200 минг тенгедан ортиқ пул ўтказиб қўйди-ку. Лекин кўп ўтмай, фирибгарнинг тузоғига осон илинганини тушунди. Худди шундай буюртма бериб, бир неча кунлардан буён товарини ололмай юрган бир-икки одамларнинг шубҳали веб-сайтга ёзган изоҳларидан ҳушёр тортди. Полицияга мурожаат қилди. У ердагилар бу иш интернет фирибгарларининг навбатдаги ҳийласи эканлигини айтишди. Полициячилар бўлимга келиб тушаётган мурожаатлар ва аризаларнинг аксарияти интернет тармоқларида кенг тарқалаётган реклама ёрдамида, тез ва қисқа фурсат ичида товар етказиб беришлар тўғрисида эканлигини айтишди. 

Хуллас, пул ҳам йўқ, товар ҳам йўқ. Интернет каззоблари содда одамларнинг маблағини ўз ҳисоб-рақамларига тушириб олганларидан сўнг, саҳифаларини ўчириб ташлайди. Тергов учун эса етказилган зарарни кўрсатадиган манзил, шахс бўлиши керак. Зиёда онлайн реклама ва бир-икки телефон рақамларидан бошқасини билмайди. У шу тариқа куйиб қолди. 

Огоҳ бўлинг, ҳушёр бўлинг, нотаниш кимсалар билан мулоқот қилишнинг охири вой. Ҳеч ким сизга йўқотган пулингизни ундириб беролмайди. Бир неча кунлик веб-сайт фаолиятини текшириб, унинг ҳақиқийлигини аниқлаш имконияти ҳам йўқ. Маълум даражада, шубҳали онлайн сайтларни муҳосара қилиш чоралари мавжуд, албатта. Лекин, бунгача одамлар номаълум шахсларнинг ҳисоб-рақамларига ўзи ҳақидаги барча маълумотлар ва пулларини ўтказиб қўйишмоқда.